Mark 10
Gong tikas i Lin Antu
(Mt 19:1�12; Lk 16:18)
1Ke, Iesu ka aptih tinaiwa, una nanal na Iudaia, ma ka sopaket dan na Ioridan. Ma tara gur na fanu ri ka la usuf i, ke ka fausum ri arae tom i tel u la.2Fal e Farasi ri ka la usuf i isi rin tof u. Ke ri ka diik u aragii, “I tortores tom na nagogon kirer le nenge kaltu in lin antu, le biil?”
3Ke Iesu ka kiliis ri aragii, “Moses i ta Nagogon arafah tah usuf gam?”
4Ri ka kiliis u aragii, “Moses i somangat le nenge kaltu in sisiit na nenge aun buk una puk fakekel, isi ik lin antu.”
5Iesu ka fas ri aragii, “Moses i siit ta nagogon ae usuf gam i wara le balmi i sorokai kanaka. 6Isau le, tina tanwaran fakfakiis, ‘God i fakiis ta fanu, isi rin tapiek tamat ke fifin.’ 7‘I e wara ke nenge kaltu ik la koseng tama ru e tina, ma ik kiis turim tura antu, 8isi ruk tapiek arae itikii sau.’ Ma biil mang in u lo ruh, run tapiek arae itikii sau. 9Pesu, sanih ae God ka faturim ta u, gong tikas i tempaek u.”
10Ri ka fis sabin una fel, ke berberat na fafausum ri ka diik Iesu sabin isi sanih ae i use ta u. 11Ka kiliis ri aragii, “Male tikas i lin antu, ma ka telpes ti fifin sabin, kaltu ae i tel sinagun puur usuf antu famu. 12Ke, male ti fifin i lin antu ma ka telpes tikas sabin, fifin sabin ae i tel sinagun puur.”
Iesu i Fakalok Birbiron Berberat
(Mt 19:13�15; Lk 18:15�17)
13Fale fanu ri ka filange birbiron berberat usuf Iesu isi in luun lima na olri. Isau le berberat na fafausum kia ri ka tikale ri. 14Aunbiing Iesu i par u arae, ma ka ngaliaf ke ka fas ri aragii, “Gam sok ufu birbiron berberat ae usuf iau. Gong gam tikale ri. Wara le matanfuntih ke God, ken fanu ae ri arae berberat igii. 15Tekentu kanaka ia fas gam, male tikas i ier isi in kau na matanfuntih ke God, isau le biil i arae fabiro kalalik, biil tom ifasih in kau.” 16Ke ka diit pes berberat ae, ka luun iun lima lo ri, ke ka fakalok ri.Kaltu ae i Fuun e Minsik kia i Orek tura Iesu
(Mt 19:16�30; Lk 18:18�30)
17Aunbiing Iesu ka tipes la sabin, nenge kaltu ka filau usuf i, ke ka ilepul na mata, ma ka diik u aragii, “Rokap na Tom Fafausum, sanih ian tel u isi iak kep liu fitliu?”18Ke Iesu ka kiliis u aragii, “Isi sanih o ka foteng iau le ia rokap? Biil tikas i rokap, God keskes sau. 19O ka usum tah na foron nagogon: ‘Gong o siimete tikas, gong o tel sinangun puur, gong o suksukuum, gong o tiu foes tikas, gong o lem pes ti tier ken tikas, on bulat lo tamam ru e tinam.’”
20Kaltu ae ka kiliis u aragii, “Tom Fafausum, tipes u na aunbiing ia kalalik tah, ka papang igii, ia misuut la na foron nagogon tikii igii.”
21Iesu ka par una mata, ma ka mais kanaka u, ke ka tara sing i aragii, “Nenge tier biitom on tel u. La ma ok luun foron minmaram tikii isi fanu rik fiil u ma pitkalang lo, on ta u usuf foron lauu. Male on tel u arae, kiam e minsik buuii na kukulii. Namih ok fis, ke ok mi lo iau.”
22Aunbiing i ongen orek ae, ka bututuk e mata, ma ka la turan mamais, wara le ifuun kanaka e minmara.
23Iesu ka giliim usuf berberat na fafausum kia ke ka tara aragii, “I ngangaten kanaka isi fanu ae i fuun e minsik kiri, rin kau na matanfuntih ke God.”
24Berberat na fafausum kia ri ka lala bitit na orek ae. Isau le Iesu ka tara sabin sing ri aragii, “Berberat kiak, i ngangaten kanaka isi fanu rin kau una matanfuntih ke God. 25I ngangaten usuf kamel isi in kau na solsol na nil una somap, isau le i ngangaten kanaka usuf nenge kaltu ae ifuun e minsik kia isi in kau na matanfuntih ke God.”
26Berberat na fafausum ri ka lala bitit ma ri ka diik fafis ri tom aragii, “Male i arae, ke seh mang ifasih in kep liu fitliu?”
27Iesu ka par usuf ri, ke ka tarah, “Fanu biil i fasih rin tel u, isau le God, i fasih in tel foron tier tikii.”
28Pita ka tara sing Iesu aragii, “Par u, kemem ka la koseng foron tier tikii tah kimem, ke kemem ka mi lo wo.”
29Iesu ka fas u aragii, “Tekentu kanaka ia fas o, biil ti kaltu ae i la koseng fel kia, le koseng tualik le fenelik, le koseng tina ru e tama, le koseng berberat kia, le koseng nanal kia, iwara lo iau ke na Rokap na Fafas, 30ae na liu igii, ma in kep in fuun tom e tier. In kep nenge mar e fel, nenge mar e tualik, nenge mar fenelik, nenge mar e tina, nenge mar e kalalik kia ke nenge mar e sun nanal kia, ke fanu rin ta fangungut sabin usuf i. Ke na liu ae namih in kep liu fitliu. 31Isau le ifuun ae ri famu ta igii, namih rin mih, ma fanseh ae ri mih igii, namih rin famu.”
Fatuul u e Aunbiing Iesu i Use u le in Met
(Mt 20:17�19; Lk 18:31�34)
32Iesu i famfamu la ini berberat na fafausum kia, aunbiing ri tatkau una Ierusalem. Ke berberat na fafausum kia ri ka lala bitit, ma fanu sabin ae ri mi lo ri, ri ka sokeh. Iesu ka lame pes sangful ini u e kalalik na fafausum kia, ke ka fas ri sabin ini sanih ae in tapiek lo. 33Ka fas ri aragii, “Gam par u, igii kerek tatkau mang una Ierusalem. Ke rik ta ufu Kalalik ken Kaltu mang una liman foron laulaumet na pris ke foron tom fafausum ini nagogon. Rin nagogon u isi ik met, ke rik ta ufu usuf fanu ae biil ri fan Iudaia. 34Rin morot ini, rin ubis u, rin pis u ke rik siimete u. Isau le na fatuul u e biing, ik aptih fis sabin.”Sising ke Jems ru e Jon usuf Iesu
(Mt 20:20�28)
35Namih, iun kalalik ke Sebedi, Jems ru e Jon, ru la usuf Iesu ke ru ka tara aragii, “Tom Fafausum, kama ier le on tel sanih ae kaman sising u sing o.”36Ke ka diik ru aragii, “Sanih kamu ier isi ian tel u kimuh?”
37Ru ka fas u aragii, “Aunbiing on tapiek king, on fakiis kamah na memeh kiam, isi kertuulek nagogon turim, neng na miam ke neng na kaisam.”
38Iesu ka kiliis ruh aragii, “Biil kamu usum na sanih ae kamu sising isi. Arafah, ifasih kamun yin tina kap ae ia yin lo? Ke ifasih kamun kep bapitaiso ae rin baptais iau ini?” ▼
39Ru ka kiliis u aragii, “Kama fasih.” Iesu ka fas ruh aragii, “Kamun yin tina kap ae ia yin lo, ke kamun kep baptaiso ae rin baptais iau ini. 40Isau le isi kiis na miang le na kaisang, biil ia parpar lo isi iak ta u. God tom in ta u usuf fanseh ae ka fageges ta u usuf ri.”
41Aunbiing nenge sangful e kalalik na fafausum ri ka ongen u arae, ri ka ngaliaf ulo Jems ru e Jon. 42Iesu ka kam turim ri, ma ka tarah, “Gam usum lo le fanseh ae ri foteng ri arae foron king ken fanu ae biil ri fan Iudaia, ri nagogon falaulau fanu la. Ma foron piran famfamu kiri sabin ri luun foron rakrakai na nagogon la na olon fanu. 43Isau le gong gam tara arae ri. Male tikas i ier isi le in tapiek laulaumet kimi, ke in fasabiro pes u tom ma ik tapiek tom foim kimi. 44Ma seh i ier isi in famfamu kimi, ke in arae fafauun ken fanu tikii. 45Wara le Kalalik ken Kaltu sabin biil i tapiek isi fanu rin tel foim una lupes u. I tapiek isi i tom in tel foim una lupes fanu, ke ik ta liu kia tom, una fasengsegeng fanu fuun.”
Iesu i Faliu nenge Kut
(Mt 20:29�34; Lk 18:35�43)
46Ke ri ka tapiek na Jeriko. Aunbiing Iesu turan berberat na fafausum kia ke tara gur na fanu sabin ri aptih tinaiwa, nenge kaltu ae i kut, asa e Bartimeus (kamtinan as ae le kalalik ke Timeus), i kiis la na baban sal isi sising fanu. 47Aunbiing i ongen u le Iesu tina Nasaret apiek, ka tautau aragii, “Iesu, kalalik ke Dewit, on mais iau!”48Ma fanu fuun ri ka tikale u isi gong i tautau. Isau le ka lala tautau mang tom aragii, “Kalalik ke Dewit, on mais iau!”
49Iesu ka sotih ma ka tarah, “Tawi u uga.” Ri ka tawi pes kut ae, ke ri ka tara sing i aragii, “On laes! Aptih! Iesu i tawi o.” 50Bartimeus ka tel ufu kaen ae i boboh la ini, ka sotih ma ka la usuf Iesu.
51Ke Iesu ka diik u aragii, “Sanih o ier isi le ian tel u ini wo?”
Kut ae ka kiliis u aragii, “Tom fafausum, ia ier isi ian par.”
52Iesu ka fas u aragii, “La, unune kiam ka faliu ta wo.” Fanpil ka par, ke ka mi lo Iesu tole sal.
Copyright information for
TGG